20․03․2023թ․
ՀՀ արդարադատության նախարարության «Իրավական կրթության և վերականգնողական ծրագրերի իրականացման կենտրոն» ՊՈԱԿ-ի (այսուհետ՝ Կենտրոն) վերականգնողական ծրագրերի և հանրակրթության բաժնի պետ Հասմիկ Հովակիմյանի և նույն բաժնի գլխավոր մասնագետ Արտաշես Մակարյանի նախաձեռնությամբ, ՀՀ արդարադատության նախարարության «Արմավիր» քրեակատարողական հիմնարկի սոցիալական, հոգեբանական և իրավական աշխատանքների բաժնի հետ համատեղ «Իրավախախտում կատարած անձանց գեղագիտական դաստիարակություն և կրթություն» ծրագրում ընդգրկված դատապարտյալների համար կազմակերպել էր «Տյառնընդառաջ» թեմայով գիտահանրամատչելի, մշակութային միջոցառում։
Միջոցառման բանախոս Արտաշես Մակարյանը մասնակիցներին ներկայացրել է «Տյառնընդառաջ» անվան ծագումնաբանությունը և նշանակությունը։ Ա․Մակարյանը պատմել է տոնի խորհուրդի, արմատների, խորհրդանիշների մասին, ինչպես նաև Հայաստանի տարածքում Տյառնընդառաջը նշելու ազգային ավանդույթների մասին։
Միջոցառման ավարտին թեմայի վերաբերյալ դատապարտյալների հետ տեղի է ունեցել ակտիվ քննարկում` հարց ու պատասխանի ձևաչափով։
Նույն օրը Կենտրոնի կողմից իրականացվող «Իրավախախտում կատարած անձանց գեղագիտական դաստիարակության և կրթական ծրագրերի իրականացում՝ առանց տարիքային սահմանափակման» հանրակրթական ծրագրի շրջանակներում հայոց լեզու և գրականություն առարկան դասավանդող ուսուցչուհի Լուսինե Թովմասյանի նախաձեռնությամբ ՀՀ ԱՆ «Արմավիր» քրեակատարողական հիմնարկի սոցիալական, հոգեբանական և իրավական աշխատանքների բաժնի հետ համատեղ տեղի է ունեցել հանդիպում- քննարկում գրող, նկարիչ, իրանագետ Միհրդատ Հախվերդյանի հետ։
Միջոցառման ընթացքում Մ․ Հախվերդյանը մասնակից դատապարտյալներին ներկայացրել է հայ- իրանական մշակույթի նմանությունը՝ սկսած Ք․Ա ․ առաջին հազարամյակից։
Միջոցառման ավարտին բանաստեղծն ասմունքել է իր ստեղծագործություններից։
