«Իրավական կրթության և վերականգնողական ծրագրերի իրականացման կենտրոն» ՊՈԱԿ-ի Հանրակրթության բաժինը իրականացնում է ՀՀ քրեակատարողական հիմնարկներում պահվող անձանց հանրակրթության կազմակերպման գործընթացը՝ խթանելով ազատազրկման ձևով պատիժ կրող անձանց կրթության իրավունքի իրացումը և վերասոցիալականացումը։
Հանրակրթական ծրագրերը նպատակ ունեն ոչ միայն ապահովել պարտադիր միջնակարգ կրթության իրավունքը, այլև նպաստել դատապարտյալների անձնային աճին, արժեքային համակարգի փոփոխությանը և հասարակություն վերաինտեգրմանը՝ կրթության միջոցով։
2022 թվականի սեպտեմբերի 1-ից Կենտրոնը իրականացնում է «Իրավախախտում կատարած անձանց գեղագիտական դաստիարակության և կրթական ծրագրերի իրականացում՝ առանց տարիքային սահմանափակման» հանրակրթական ծրագիրը։ Ծրագիրը գործում է հետևյալ քրեակատարողական հիմնարկներում՝
«Արմավիր», «Նուբարաշեն», «Արթիկ», «Աբովյան», «Սևան», «Վանաձոր», իսկ 2024-2025 ուսումնական տարում նաև՝ «Գորիս» քրեակատարողական հիմնարկում։
Ծրագիրը հիմնված է ՀՀ Կառավարության կողմից 2019 թվականին հաստատված «Ազատությունից զրկված անձանց համար հանրակրթության իրականացում՝ անկախ տարիքից» միջոցառման վրա, ինչպես նաև 2022 թվականի ՀՕ-130-Ն օրենքով «Կրթության մասին» օրենքում կատարված լրացման, որով քրեակատարողական հիմնարկներում պատիժ կրող դատապարտյալները կարող են կրթություն ստանալ՝ պետական բյուջեի միջոցների հաշվին։
Դատապարտյալները կրթության գործընթացին մասնակցում են որպես էքստեռն՝ ստանալով հիմնական և միջնակարգ կրթության վկայականներ համապատասխան ավարտական քննությունների հաջող հանձնելու պարագայում։
Ծրագրի արդյունքները՝ ըստ ուսումնական տարիների
2022–2023 ուսումնական տարի
- Կրթության կարիք ունեցող դատապարտյալներ՝ 306
- Ծրագրում ընդգրկված՝ 92
- Ծրագիրն ավարտած՝ 56
- Էքստեռն քննությունների դիմած՝ 37
- Վկայական / ատեստատ ստացած՝ 31
2023–2024 ուսումնական տարի
- Կրթության կարիք ունեցող դատապարտյալներ՝ 269
- Ծրագրում ընդգրկված՝ 56
- Ծրագիրն ավարտած՝ 28
- Էքստեռն քննությունների դիմած՝ 23
- Դրական արդյունք՝ 16
- Չներկայացած՝ 4
- Բացասական գնահատականներ՝ 3
2024–2025 ուսումնական տարի
- Կրթության կարիք ունեցող դատապարտյալներ՝ 209
- Ծրագրում ընդգրկված (սեպտեմբերին)՝ 66, որոնք դեկտեմբերին դարձել են 71
- Ներկայումս ներգրավված են՝ 53 դատապարտյալ
Հանրակրթական գործունեության իրականացման համար Կենտրոնն ունի համապատասխան լիցենզիաներ, որոնք տրամադրվել են ՀՀ Կրթության և գիտության նախարարության կողմից 2018 թվականի մարտի 21-ի թիվ 250-Ա/2 և 251-Ա/2 հրամաններով։ 2018 թվականին հաստատվել է նաև Կենտրոնի կողմից մշակված ուսումնական պլանը՝ քրեակատարողական հիմնարկներում կիրառման նպատակով։
Ավելին, 2019 թվականից Կենտրոնը իրականացնում է նաև «Մինչև 19 տարեկան ազատազրկման ձևով պատիժ կրող և կալանավորված անձանց հանրակրթական հիմնական ընդհանուր պետական ծրագիրը», որը հնարավորություն է տալիս անչափահաս անձանց շարունակել կրթությունը նաև քրեակատարողական հիմնարկում։
Հանրակրթության բաժնի գործունեությունը նպաստում է վերականգնողական արդարադատության զարգացմանը Հայաստանում, կրթության և ինքնազարգացման միջոցով ապահովելով ազատազրկված անձանց վերաինտեգրումը հասարակությանը։
Թարմացված է՝ 06․06․2025