27.04.20232.
Ապրիլի 25-ին և ՀՀ արդարադատության նախարարության «Իրավական կրթության ու վերականգնողական ծրագրերի իրականացման կենտրոն» ՊՈԱԿ-ի (այսուհետ՝ Կենտրոն) և Հայաստանի Հանրապետության արդարադատության նախարարության «Վանաձոր» քրեակատարողական հիմնարկի սոցիալական, հոգեբանական և իրավական աշխատանքների բաժնի աջակցությամբ, պատմության ուսուցիչ Ռոբերտ Եղյանի նախաձեռնությամբ տեղի է ունեցել «Հայոց ցեղասպանությունը, մեր անելիքները» խորագիրը կրող միջոցառումը: Միջոցառմանը մասնակցել են Կենտրոնի կողմից իրականացվող կրթական ծրագրերում ընդգրկված դատապարտյալները, ուսուցիչներ, Կենտրոնի հանրակրթության մասնագետը և ՀՀ ԱՆ «Վանաձոր» քրեակատարողական հիմնարկի ՍՀԻԱ բաժնի աշխատակիցներ:
Միջոցառման նպատակն էր հասցնել լսարանին հետևյալ գաղափարները՝ երբեք չմոռանալ և հիշել Հայոց ցեղասպանությունը, հասնել Հայոց մեծ եղեռնի միջազգային ճանաչմանը և հետագայում, ելնելով պատմության դասերից, խուսափել ցեղասպանության կրկնությունից:
Ապրիլի 26-ին ՀՀ արդարադատության նախարարության «Աբովյան» քրեակատարողական հիմնարկում Կենտրոնի կողմից իրականացվող կրթական ծրագրերում դասավանդող պատմության և հասարակագիտության ուսուցչուհի Աննա Մուրադյանը ՀՀ ԱՆ «Աբովյան» քրեակատարողական հիմնարկի սոցիալական, հոգեբանական և իրավական աշխատանքների բաժնի աջակցությամբ, անցկացրել է դաս-միջոցառում` նվիրված հայոց ցեղասպանության 108-րդ տարելիցին ։ Ուսուցչուհի Ա. Մուրադյանն իր խոսքում ընդգծել է այն փաստը, որ Մեծ եղեռնը մեր պատմության մեծագույն ողբերգությունը լինելուց բացի նաև ամենակարևոր դասն է, որից պետք է հետևություններ անել նաև մեր օրերում։
Միջոցառմանը հանրակրթական ծրագրերի մասնակիցը կատարել է հայրենասիրական երգեր, ասմունքել է և ներկայացրել է հայկական ցեղասպանության իրագործման փուլերը: Այդ ամենն ուղեկցվել է սահիկաշարերի ցուցադրմամբ։
Ներկա գտնվող ուսուցիչներն ու աշակերտները կարևորել են՝ ազգի հավաքական ուժի ու հզոր հայրենիքի կառուցման անհրաժեշտությունը հայոց ցեղասպանության ճանաչմանն ու հատուցմանը հասնելու գործում։
Ա. Մուրադյանը միջոցառումը եզրափակել է այն մտքով, որ Նժդեհի ոգով դաստիարակված, գիտելիքներով զինված պատմական հիշողությամբ սերունդն է մեր առաջընթացի հիմքը։ Նկարների հղման աղբյուրը՝ այստեղ:
