05.04.2023թ.
Ապրիլի 4-ին ՀՀ արդարադատության նախարարության «Արմավիր» քրեակատարողական հիմնարկում տեղի ունեցավ «Պուշկինի, Լերմոնտովի և Եսենինի սիրային լիրիկան» խորագիրը կրող միջոցառում: Այն կազմակերպվել էր ՀՀ արդարադատության նախարարության «Իրավական կրթության և վերականգնողական ծրագրերի իրականացման կենտրոն» ՊՈԱԿ-ի կողմից իրականացվող «Իրավախախտում կատարած անձանց գեղագիտական դաստիարակության և կրթական ծրագրերի իրականացում՝ առանց տարիքային սահմանափակման» հանրակրթական ծրագրի «Ռուսաց լեզու» և «ՏՀՏ» առարկաների շրջանակներում: Միջոցառումը պատրաստեցին և վարեցին ուսուցչուհիներ՝ Լիլյա Հարությունյանը և Մանուշակ Թևանյանը, ՀՀ ԱՆ «Արմավիր» քրեակատարողական հիմնարկի սոցիալական, հոգեբանական և իրավական աշխատանքների բաժնի աջակցությամբ:
Միջոցառման ընթացքում հանրակրթական ծրագրում ընդգրկված ավագ և հիմնական դպրոցներում սովորող դատապարտյալները ներկայացրեցին ռուս մեծանուն գրողների պոեզիան, հնչեցին նշյալ գրողների լիրիկական ստեղծագործությունները, իսկ ձևավորումը և նյութերի տեսարժանությունը ապահովվել էր «ՏՀՏ» առարկայի շրջանակներում՝ տեսասահիկի միջոցով սովորողների կողմից պատրաստված թեմատիկ պատկերներով:
