«Արթիկ» քրեակատարողական հիմնարկում տեղի է ունեցել միջնակարգ կրթության ատեստատների, հիմնական կրթության վկայականների, հավաստագրերի հանձման արարողությու

Այցի շրջանակում շուրջ 16 դատապարտյալներ ստացել են մասնագիտական պատրաստվածությունը հավաստող փաստաթղթեր՝ մասնակցելով 2024թ․ օգոստոսի 1-ից մեկնարկած «Շինարարական հմտություններ» դասընթացին։

Ծրագրի ընթացքում գործել է երկու ուսումնական խումբ․ 13 դատապարտյալներ ստացել են հավաստագրեր, իսկ 3-ը՝ վկայագրեր՝ հաջողությամբ ավարտելով գործնական և տեսական փուլերը։

Դասընթացի մեկնարկից առաջ իրականացված կարիքների գնահատումը ցույց է տվել, որ շինարարական հմտություններ մոդուլը այս քրեակատարողական հիմնարկում ունի բարձր պահանջարկ, և դրանց զարգացմանն ուղղված ծրագրերը կարևոր նշանակություն ունեն դատապարտյալների ապագա մասնագիտական ինտեգրման համար։

Այցի ընթացքում քննարկվել են նաև ծրագրի ընդլայնման հնարավորությունները։

Մասնավորապես՝ առաջիկայում նախատեսվում է նոր ուղղության մեկնարկ՝ մեղվաբուծության հմտությունների ուսուցման ծրագրի շրջանակում։ Մեղվաբուծությունն առանձնանում է ոչ միայն որպես տնտեսապես արդյունավետ ոլորտ, այլև ունի բարենպաստ ազդեցություն հոգեբանական և սոցիալական վերականգնման գործընթացում։ Այն դատապարտյալներին կարող է ապահովել օգտակար զբաղվածությամբ։

Տեղեկացնենք նաև, որ այցի շրջանակում «Իրավախախտում կատարած անձանց գեղագիտական դաստիարակություն և կրթական ծրագրերի իրականացում առանց տարիքային սահմանափակման» հանրակարթական ծրագրի շրջանակում 2022-2023 ուսումնական տարվա ընթացքում ՀՀ ԱՆ «Արթիկ» ՔԿՀ-ից միջնակարգ կրթության ատեստատ ստացել են 5 և հիմնական կրթության վկայական՝ 2 դատապարտյալ։

2 դատապարտյալ ստացել են նաև պատվոգիր կրթական և մշակութային միջոցառումներին ակտիվ ներգրավվածության, դրական վարքագծի, ավարտական և պետական ավարտական քննություններին ցուցաբերած բարձր ցուցանիշների համար։

ՀՀ ԱՆ «Իրավական կրթության և վերականգնողական ծրագրերի իրականացման կենտրոնը» շարունակելու է իր հանձնառությունը՝ խթանելու մասնագիտական կրթությունը և գործնական հմտությունների ձևավորումը անազատության մեջ գտնվող անձանց շրջանում՝ նպաստելով նրանց վերաինտեգրմանը հասարակություն։